زبہری ۔ اِنام رزا ۔ بلوچی مراگش بام Zebahri . Inam raza USA-ES

آزمانک۔ زبھری۔۔۔۔۔۔ انام رزا شریش ءِ بزیں ساھگ ءَ گورپات ءِ سرءَ نشتگیں جنین جیڑگ ءَ انت۔ شریش ءِ پلانی وشیں بوہ ءٙ گوات آتار انت۔ برز ءَ شاھے ءِ سرا کلی یے نشتگ ءُ چلی چلی کنگ ءَ انت ۔ چہ دور ءَ ٹریکٹرے ءِ ٹیپ ءَ بلوچی سوتے ءِ توار بازار ءَ تالان انت ۔ کچکے چہ شریش ءِ ساھگ ءَ کمے پسِند کاپر ءِ پُرشتگیں منک ءِ بن ءَ وپتگ ءُ لٹک ءَ سرینگ ءَ انت۔ بے کمپانیں لوگ اٙنت ۔ لوگانی میان ءَ چیرکشکے روت کہ چمداں برے برے مردمے مردمے گوزیت ءُ دیم پہ بازار ءِ نیمگ ءَ روت ۔ نوک بروتیں ورناھے چمے چیر کشک ءَ گوزان ءُ چہ شریش ءِ ساھگ ءَ کمے ھما دیم انت۔ جنین ءِ دیم گوں نوک بروتیں بچک ءَ انت ۔ بچک سُست سُست ءَ روگ ءَ انت جنین آئی ءَ انچو روک روک ءَ چارگ ءَ انت گوش ئے زاناں آئی ءِ گامگیجاں ھساب کنگ ءَ انت۔ آ جیڑگ ءَ انت کہ منی زندگی چو ھمے بچک ءِ سُستیں گامگیجان انت نہ زوت منزلے ءَ سر بیت ءُ نہ پشت ءَ واتر کنت۔ دوشی آئی ءَ اجبیں وابے دیستگ ات۔ چوناھا آئی ءَ ھر وھد ءَ واب دیستگ ات تہ آئی ءِ واب نیم بندگ بیتگ ات انت ھمے کہ آ وابانی آسر ءَ سر بئیگی بیتگ چہ آ واب ءَ گڑاتگ ۔ دوشیگیں واب پرائی ءَ یک نیمگے تکانسر کنوکیں وابے ات ءُ یک نیمگے پرائی ءَ پر تاھیر ات ۔ ھمے واب ءِ آسر ات کہ پرائی ءَ جیڑگانی درے بوتکگ ات ے ، چد ءُ پیش آئی ءَ ناں جیڑگ زانتگ ات ءُ نہ آئی ءَ پہ جیڑگ ءُ پگر کنگ ءِ موہ رس اتگ ات ، آئی ءِ زندگی بس چہ وتی کلنڈیں بان ءَ بندات بوت ءُ لوگ ءِ پیژگاہ ءِ چپ ءُ چاگردءَ پر تران ءَ داں پدءَ کلنڈیں بان ءَ شپ کپت۔ آ جیڑگ ءَ ات کہ مردم ءِ واب پرچا نیم بندگ بنت ؟ مردم ءِ واھشت ءُ تما پرچا سرجم بوگ ءَ پیسر ساہ دینت ؟ مردم پرچا وتی واھگاں دست ءِ وت کل ءُ کسارت کن انت ؟ مردم پرچا وتی رژناھیں زندگی ءَ تھاریانی کورچات ءَ چگل دینت ؟ زندگی ءِ تھاریں کورچات ءَ کپتگیں مردم پرچا پہ درآھگ ءَ سر ءُ پاد نہ جنت؟ مردم پرچا پہ دگر ءِ زندگی ءِ تیلانک دیگ ءَ وتی جند ءِ لوٹ ءُ واھشاں زندہ درگور کن انت؟ آ جیڑگ ءَ ات کہ من پرچا زندگاں؟ پہ وت ءَ یا پہ دگرے ءِ روچانی گوازینگ ءَ؟ آ جیڑگ ءَ ات کہ بے زبانیں مردم پرچا زبان نہ رودین انت ؟ آ جیڑگ ءَ ات کہ مردم پرچا گنگیں زبانانی اندرءَ چیر تراتگیں اپّاراں زانت نہ کن اٙنت؟ نوک بروتیں ورناہ گسر کپتگ ات ءُ آئی ءِ پادانی پد پش کپتگ ات انت بلے آئی ءِ چم انگت ھما کشک ءَ سک ات انت کہ نوک بروتیں ورناہ ءِ پادانی پد کپتگ ات انت۔ کلی ءَ چہ شریش ءِ شاہ ءَ بال کتگ ات ءُ بیگم جنگی ءِ لٹ ءِ سرءَ نشتگ ات۔ کچک چہ کاپرءِ منک ءَ پاد اتکگ ات ءُ آئی ءِ نزیک ءَ اتکگ ات ءُ گوں شریش ءِ بنڈءَ وتی بڈ ءَ گورموش دیگ ءَ ات۔ چہ کنوری ءَ ھیرانانی کٹینگ کٹانگانی توارءَ زانگ بئیگ ءَ ات کہ روچ نیمروچ انت ۔ انگت آئی ءِ جیڑگانی در سرجم ءَ نہ بتکگ ات کہ چہ کنوری ءَ پیریں جنینے ءِ توار ءَ آئی ءِ جیڑگ نیم بندگ کت انت۔ "بیا جنے تو سھبگینیں شریش ءِ ساھگ ءَ میھ جتگ ئے وتی مرد ءَ بر پسیل ءَ آبدستے کنائین ءُ بیا کہ کنورءِ وھد انت" آئی ءَ جیڑ ات کہ دریگتیں من گوں ہمے نوک بروتیں ورناہ ءِ رند پداں بہ شتیناں گوں ۔ Short story " Zebahri " writter : Inam raza . voice : nisar yousuf presented by baam shuben . #balochishortstory #balochiliterature

Category